Saberes do Monte. Hábitats que alimentan.

Que é Saberes do Monte?

Saberes do Monte é unha marca que nace para poñer en valor os produtos procedentes de áreas de montaña galegas que axudan á conservación dos hábitats e ao desenvolvemento das comunidades rurais.

A marca xorde a partir do traballo desenvolvido polas Universidades de Santiago de Compostela e A Coruña no marco do proxecto RURALtXA!, como unha ferramenta estratéxica para achegar cohesión e reforzar a identidade común das áreas involucradas: Serra do Xistral, Monte Maior, A Faladoira e A Groba. Axuda a posicionar os diferentes produtos e servizos no mercado, facilitando o seu recoñecemento e valoración.

A súa misión

A marca busca promover actividades tradicionais que teñen un papel crave na conservación de certos hábitats naturais, como son as turbeiras e os queirogais húmidos de Galicia, de gran interese para a Unión Europea. Estas actividades son a gandería extensiva, o sistema de manexo tradicional dos cabalos salvaxes, a apicultura e o ecoturismo, O obxectivo da marca é facilitar ao mercado a identificación dos produtos e servizos procedentes destas áreas e destas actividades tradicionais e difundir a súa importancia para impulsar a bioeconomía rural.

A súa visión

Ser un referente na promoción de prácticas sostibles que integren a conservación da biodiversidade co desenvolvemento socioeconómico local, apoiando ás cmunidades rurais e fomentando o ecoturismo en Galicia é máis alá.

Os seus valores

Os valores que reflicten os produtos e servizos que levan este distintivo son:

• Sostibilidade: compromiso coa preservación de hábitats e fomento de prácticas gandeiras e agrícolas sostibles, cun enfoque na conservación dos recursos naturais de montaña a longo prazo.
• Colaboración: traballo conxunto coas comunidades locais e actores rexionais para dar pulo ao desenvolvemento e conservar os recursos naturais.
• Resiliencia: adaptación aos retos ambientais e sociais, fortalecendo a contorna rural e promovendo a continuidade das tradicións locais nun mundo en constante cambio.
• Revitalización rural: a través da bioeconomía, impulsamos o desenvolvemento das comunidades locais sen comprometer o medio natural.

Os verdadeiros protagonistas

En todo este proceso, os verdadeiros protagonistas son as persoas produtoras (gandeiras, apicultoras etc.) que, grazas ao seu traballo diario e á posta en práctica dos coñecementos tradicionais adquiridos a través dos seus antepasados, axudan a conservar hábitats tan singulares que nos achegan á sociedade multitude de servizos ecosistémicos. Por iso, se queres coñecer quen son, está atento ao apartado de bioeconomía da nosa web onde iremos subindo a súa información (https://ruraltxa.com/bioeconomia/).

Saberes do Monte: sabor biodiversidade e tradición.

👉 Link ao apartado de Bioeconomía