01.10.2025
Xa están dispoñibles para consultar na web os informes que recollen os resultados dos estudos que se realizaron ao longo do proxecto para coñecer a percepción social na valoración dos servizos ecosistémicos nas áreas piloto de RURALtXA! e para avaliar os principais servizos ecosistémicos xerados polos hábitats de interese comunitario e as actividades tradicionais vinculadas.
O primeiro deles ten como obxectivo analizar a percepción dos actores locais nas áreas de actuación do proxecto sobre a capacidade dos montes para proporcionar servizos ecosistémicos de abastecemento, de regulación e culturais (clasificación CICES 5.2). Para iso fixéronse unha serie de cuestionarios a propietarios privados, integrantes dos Montes Veciñais en Man Común participantes no proxecto, empresas e asociacións locais, ONGs e tamén representantes dos concellos das áreas piloto.
Hai que destacar a valoración positiva e o consenso acerca da importancia destes hábitats para a produción gandeira en extensivo (especialmente de vacún e equino) ou a produción apícola, así como a importancia en diversos servizos de regulación como a mitigación do cambio climático, a loita contra a erosión, a mellora na calidade da auga ou a protección da biodiversidade.
O segundo informe permitiu caracterizar e cartografar a provisión potencial e real de servizos ecosistémicos nas áreas do proxecto. Analizouse a provisión potencial para un total de 51 servizos ecosistémicos, profundando na valoración de catro deles, considerados dos máis relevantes dos que están vinculados a un manexo gandeiros sostible en hábitats de interese comunitario: a produción gandeira, a biodiversidade (riqueza de especies), a produción de mel e o ecoturismo.
En termos xerais, destaca que máis do 50% da superficie avaliada ten unha alta capacidade potencial de provisión de servizos ecosistémicos, poñendo de manifesto a importancia de conservar estes hábitats para as xeracións futuras.
Os dous informes aos que fai referencia esta noticia están no apartado de publicacións da web de RURALtXA!:
A6.1. Análise da percepción social na valoración dos servizos ecosistémicos xerados polos HIC e as actividades tradicionais vinculadas.
A6.2. Avaliación dos principais servizos ecosistémicos xerados polos HIC e as actividades tradicionais vinculadas.