20.11.2024
RURALtXA! estivo presente na Feira do Mel de Montaña o pasado 17 de novembro en Muras, no corazón da Serra do Xistral.
No Xistral prodúcese un dos mellores meles de queiroga de Galicia. Este mel ten un papel especial en RURALtXA!, por ser un produto moi asociado aos queirogais húmidos atlánticos, que son hábitats de gran importancia, protexidos a nivel europeo.
Destacou a presenza de postos de mel de persoas apicultoras incluídas na Rede de Traballo de RURALtXA!, como Picos de Coruxos e Mel Vituco, así como da Casa do Mel, unha asociación de referencia no val do Eume e no Xistral, a través da cal venden multitude de pequenos apicultores da zona, algúns deles tamén incluídos na Rede.
No posto do proxecto continuamos dando a coñecer a estratexia de RURALtXA!, a enorme importancia dos hábitats cos que traballa e o valor das actividades tradicionais para conservalos, á vez que resaltamos a importancia do consumo de produtos de gandeiros e apicultores comprometidos coa conservación da biodiversidade.