17.09.2024
RURALtXA! estivo presente a semana pasada en LCA Food 2024, un congreso científico realizado en Barcelona adicado á sustentabilidade alimentaria. Neste caso, Alberto Fraile (técnico do proxecto) estivo a presentar os avances nas investigacións que está a realizar a Universidade de Santiago de Compostela para incluír as métricas de servizos ecosistémicos nas avaliacións cuantitativas de produtos alimentarios.
Con esta investigación, preténdese poñer en valor os sistemas gandeiros extensivos, cuxo papel nos ecosistemas é fundamental para a súa conservación. Estes avances permitirán integrar os beneficios destes modelos de produción nas avaliacións ambientais de produtos e en futuras marcas.
Durante estes catro días compartimos experiencias con expertos que están a traballar noutros proxectos moi interesantes con metodoloxías que nos permitirán seguir aprendendo e avanzando na nosa análise.