29.12.2025
O proxecto RURALtXA! dá un paso máis na transferencia dos coñecementos adquiridos durante o seu desenvolvemento coa publicación de dous novos documentos de referencia elaborados polos socios vascos e galegos. Ambos manuais recollen a experiencia e as aprendizaxes xeradas no proxecto, co obxectivo de reforzar a xestión sostible dos ecosistemas de montaña, a importancia da restauración de hábitats e o papel da gandaría extensiva como ferramenta de conservación do territorio.
Por unha banda, os socios de Euskadi elaboraron unha adenda ao libro “Boas Prácticas na conservación de pasteiros de montaña. Manual de Orientación para a Xestión”, publicado orixinalmente no marco do proxecto LIFE Oreka Mendian. Esta adenda actualiza e complementa o manual incorporando os novos coñecementos adquiridos en RURALtXA!, froito do traballo técnico, da experimentación en campo e da colaboración co sector gandeiro, os propietarios e os xestores de montes. En concreto, o documento desenvolve o aprendido respecto á tenza de cans de garda e ao uso de colares de valado virtual.
Por outra banda, os socios galegos publicaron o “Manual de técnicas de restauración e mellora de queirogais e turbeiras en Galicia”, un documento específico que sistematiza as metodoloxías e experiencias desenvolvidas no proxecto para a recuperación e mellora destes ecosistemas de alto valor natural.
Con estas publicacións, RURALtXA! consolida a súa aposta pola difusión de ferramentas prácticas e aplicables, facilitando a transferencia de coñecemento a xestores, persoal técnico e ao sector gandeiro, e contribuíndo á conservación activa dos ecosistemas de montaña en diferentes territorios.
MANUAIS