UNHA FIN DE SEMANA PARA SABOREAR E COÑECER A SERRA DO XISTRAL

Os días 7 e 8 de xuño tivo lugar a primeira edición da Fin de semana Gastronómica Saberes do Monte e o primeiro Roteiro de Saber pola Serra do Xistral. Ámbalas dúas actividades forman parte das accións de promoción da mrca Saberes do Monte, desenvolvidas na Estratexia de Promoción e Comercialización de RURALtXA!. O obxectivo é diferenciar e conseguir un mellor posicionamento no mercado dos produtos derivados das actividades tradicionais que son clave na conservación destes hábitats de queirogais e turbeiras, como son a gandería extensiva de vacún, o sistema tradicional de cabalos salvaxes, a apicultura ou as experiencias ecoturísticas.

Durante toda a fin de semana, degustáronse tapas e pratos elaborados con produtos de Saberes do Monte na experiencia Fin de semana Gastronómica: carne de tenreira do produtor José Hermida, da Comunidade de Montes Veciñal en Man Común de Miñotos e carne de poldro e mel dos produtores e irmáns Javier e Raquel Vázquez Picos, de Mel Vituco. Estes foron os restaurantes participantes:

• Restaurante Asturias, en Ferreira do Valadouro, onde ademais de ofrecer como tapa e prato de menú un guiso de poldro e tenreira estofada, tivo lugar a presentación do evento. César A. Blanco, técnico da Universidade de Santiago de Compostela, foi o encargado de dar a benvida xunto a José Manuel Lamela, alcalde do Concello, e de presentar o proxecto RURALtXA!, mentres que Beatriz Suárez, directora da área de Desenvolvemento Rural da Fundación Juana de Vega, foi quen presentou aos asistentes a marca Saberes do Monte. Posteriormente, os chefs da Asociación Provincial de Cociñeiros de Lugo Juan Rubiños (Restaurante Il Furabutto de Lugo) e Bruno Pena, levaron a cabo un showcooking no que explicaron a importancia do consumo local e de calidade e a maneira de sacar o máximo partido aos produtos cos que contaban para cociñar a tapa de tenreira sobre crocante de mel e o steak-tartar de poldro aderezado con mel.
• Casa Goás, en Abadín, preparou un menú especial Serra do Xistral, no que se incluían pratos como callos de tenreira, guiso de poldro, osobuco, costeleta ou entrecosto de tenreira, así como requeixo con mel.
• Hotel Restaurante Rías Altas, en Barreiros, onde os asistentes puideron gozar dunha tapa de cachopo de tenreira, acompañada por unhas galletas elaboradas con mel.
• Restaurante Hotel Oca Playa de Foz, en Foz, onde cociñaron un steak-tartar de poldro con caviaroli, un carpaccio de entrecosto, e un arroz con carrilleiras de tenreira e cogomelos (trompetas dos mortos).
• La Taberna de Galiana, en Mondoñedo, onde se serviron tapas como o cuscús de poldro ou o wok de tenreira.

LA mañá do domingo, na experiencia Roteiro do Saber, gozamos dun percorrido guiado entre os mosaicos de turbeiras e queirogais da Comunidade de Montes de Miñotos. Da man dos guías locais Ana Pena, de Guía tu día, e Boris Vilar, de Rutas Galicia Norte, puidemos aprender sobre os hábitats que fan tan especial esta serra e a súa rica biodiversidade, o seu amplo patrimonio cultural e histórico, e a relación durante séculos do ser humano coa contorna que lle rodea en actividades como a gandería extensiva ou o manexo do cabalo salvaxe. A experiencia ecoturística contou ademais coa participación do apicultor Javier Vázquez, de Mel Vituco, e do gandeiro José Hermida, quen, co seu coñecemento tradicional na xestión de animais e do territorio, engadiron un valor diferencial á experiencia.

Queremos expresar o noso agradecemento a todas as persoas que se achegaron a coñecer máis sobre Saberes do Monte e que participaron na Fin de semana Gastronómica e/o no Roteiro do Saber, cunha mención especial aos produtores, guías e cociñeiros locais que o fixeron posible.